Kuzas ke ta skrebedo na internete – artigo de opinião + kumentario - ta dexa-nu tra alguns konkluzão sobre skrita de kriolo. Ka bustante, povo de Kabo Verde ka gosta de Alupec ku ses regra pa Skrebe Kriolo, kriolo ku se AK sa ta bai ta bai ta faze Skola, na mus-mus...
Volta y meia ta ten un rabuliso lokalizado. Sima notisiado nos Prumero-Ministro faze se diskurso na Kriolo la de alto de tribuna de Asenbleia de Nasões Unido ku justifikason klaro, mas ke poko komentadores obi, por iso no ta transkreve-l un parte: (…) N sa ta derije pa nhos na Lingua Kabuverdiano, na kriolo de Kabo Verde. N sa ta faze-l pa partilha ku nhos es jenuino patrimonio de umanidade ke nanse na prinsipio de sekulo kinze (...) N deside komunika na kriolo kabuverdiano pamode é Lingua, é Kultura, é Storia y é Memoria (…) N ta faze-l ku konviksão ma kriolidade é un valor antropolojiko de tudo Umanidade y, N ta faze-l inda, pa destaka na el nos kabuverdianidade, nos alma, nos manera de ser, nos ethós y nos pathós kabuverdiano. (…)”.
Kel es ozadia la panha maioria de Kabuverdiano deskudado de surpreza. El panha sin sinhor!
Konprovado na txuba de komentarios publikado, por izenplo, li sin, y na liberal, a propozito de notisiado supra. Leitura des kes kumentarios ta mostra-nu klaramente ma surpresa ka sta muto na Prumero-Ministro papia se Kriolo-materno, mas sin na posibilidade des ato lejitima ofisializasão de Lingua kabuverdiano y se skrita sugundo prinsipio fonetiko-fonolojiko bazeado fundamentalmente nun modo de fala Kriolo de ilha-mãe.
No debe oserba inda, ma dizasusego de maioria de kumentadores, ka sta tanto na Prumero-Ministro papia se Kriolo, el sta mas é na oportunidade de es kriolo ku se skrita fonetiko-fonolojiko bira Lingua Kabuverdiano Ofisial na Republika, ofisial na sistema de ensino-aprendizaje y de skrita normativo na dokumentos ofisial pa tudo kabuverdiano ler.
Skrebe sima bu ta papia... ler kuza ke sta skrebedo.
Sem comentários:
Enviar um comentário