Fukuto, frukuto y frututu

Nun post publikado bedjo,  N mostra manera ke kriolo ta transforma son y/ku imagen de natureza nun palavra ku signifikado. Palavra sima kes li:

fete-fete (mesmo ke fiti-fiti). v. laba na mon, movimento de mo. 1. Ora ke ta laba ropa na sedja ka bu skese de fiti-fifi sobako.

beke-beke. v. papia txeu. Reklama kontinuado. 1. Kuze ke nho sta beke-beke txeu, ki nho ka ta kala?!

mus-mus. v.  faze kuzas keto, sem raboliso, na segreda, fala baxinho. 1. Nhos fika li só na mus-mus, sima mudjer ku marido, kreke nhos ka ta faze nada oje.

bruko-bruko. v. son de rabuliso. 1. Kuze ki nhos sta li ta bruku-bruko nes vitrina?

krapu-krapu. v. fala txeu dispos de termina un konversa7diskutison/raspanete. 1. Bo ka ten razon inda bu sta krapu-krapu txeu.

fukuto (mesmo ke frukuto)adv. de rompante, inesperado, de rapente. 1. N staba ta bai na karro kanto

galinha guiné sai de dento padja fukuto...

frututu. n. y adiv. som provokado ora ki galinha ta bua. 1. Kanto N txiga perto el bua, frututu...

lote-lote. adij. y.n. mole, moletxa, sem nada ó ki sakudido. 1. N bai ordinha lete (kabra) N txa kabrito dja mama-l tudo. Mama fika-l lote-lote. 2. Nha fidjo dja N odja ma inda bu ka kume, barriga sta lote-lote. (sta na latan, pregadu ku kosta!)

bodje-bodje (mesmo ke bugo-bugo). n. resto, sobra, munha, parte, monte bokadinho padas de karkel kuza. 1. djunta kes bodje-bodje de porko bu poi na jilera pa ora ki nu fazé katxupa pa nu po-l nel el ta fika mas sabi.

tunturun. adij. forte, muskulado, tronko. 1. Nha velho era un ome tunturun y ruspetado nes kutelo. 2. Nha amiga, mundo é benba mé! El era un tronko de omi pa oje el sta oso pele... É duedo!

Fanikite (fenikite). n. kai na txon de rapente pa un motivo mas o menos notisia dezagradavel o triste. 1. Bu pode da fanikite, es bu fanikite ka ta ngana ningen mas... si bu da-l, bu ta fika la...ningen ka ta pega-bu.

Prikite. adij. labanta fasi/faxi perante un notisia. 1. Kanto el da ku mi, el ka staba ta spera... el labanta prikite el konpo kamiza... dja N pega, N fla- só kel li.