Patxida

Patxida, un papa ke ta fazedo ku fijon gros na Fogo. El ta kumedo ku lete... o ku mantega-l baka.

Patxida é un papa feto ku fijon gros (fijon pedra), mas kel fijon gros normalmente el é tudo preto, pamode branko é mas pa poi na katxupa.

Bu ta panha 1 litro de fijon preto bu ta poi na kaleron kente riba-l lume, bu ta ila-l durante 5 minuto. Dispos bu tra-l bu ta po-l na balá o nun otu kuza pa el pode nfria. Ora ke el sta frio bu ta po-l na pilon bu ta pila-l o na muidoro bu ta mui-l pa faze farinha. Bu ta tente farinha na balá de tente pa tra karepa (farelo).

Bu ta poi dos litro de agu na kaleron ku un kudje de sal bu ta toka lume te ke ferbe, o ke agu dja abri ferbura bu ta djundju-l farinha mon-mon, senpre ta mexe-l pa ka kria karoso. Ora ke agu dja kumensa ta ngrosa bu ta para ... ago, bu ta tapa kaleron bu ta dexa ba ta kuzinha na lume brando... de bes en kuando bu ta mexe kel papa pa ka kema y bu ta purba se dja kuzinha ... el ta kuzinha na mas o menus 20 minuto. 

Ora ke dja sta pronto, tra dos kudjer de patxida bu po-l na prato bu abri-l sima flor pa el pode nfria mas fasi, rega-l ku lete o ku mantega... bon prubeto.

PS: papa de patxida as ves ta masturado ku un bokadinho de farinha de mindjo, ten argen ke é sin ke el ta txa-l mas sabi.