Era un bes Lobu ku Xibinhu...

Lobu tenba um baka, nton um dia baka more. Logu ki Xibinhu da konta di distinu di baka el sai ku se artimanha:

- Nha tiu, nha tiu karni fresku, nau! Nu bai intera-l na kel bom txon di madiokera ki ta fika na ladera di rubera riba i ki dipos de tres dia el ta bira mas sabi.

Lobu seta konfianti na Xibinhu, es bai intera baka so ku rabu fora pa fika marka. Mas so ki Xinbinhu dja tenha disel ben kalkuladu, tudu dia el ta ba kumi se baka. Mas na terseru dia logu di palmanhan, sima konbinadu, Lobu bai atxa Xibinhu pa es bai kume baka.

- Xibiiinhu!, Xibinhuuu! Xibinhuuuu, ui!!!

Kabu ketu. Lobu rezolve pintxa porta pa el entra. kantu Lobu entra el atxa Xibinhu detadu kabesa kuberidu.

- Xibinhu, inda bus ta durmi!?

- Nau nha ti… nha tiu. N sta ku door na bariga…ai! ai! - Xibinhu diskubri kabesa - ami dja-m ten tres dia detadu, oji ka ta da pa N bai ku nho nha tiu, mas Nho nhu pode bai, nhu ta kume un parti nho ta guarda-m di meu…

Nton Lobu barbaridu tudu kontenti el pensa logu me ta kumi baka tudu ma nada e ka ta guarda Xibinhu. El sai ta bai, kantu e txiga na lugar el odja rabu el frega mon di kontenteza i el raganha boka el pega na rabu el puuuxa ku tudu forsa i e kai pe pa riba ku rabu na mon. Lobu spia pa rabu: - Logu bo, Xiiiibinhu, bu kume-m nha baka tudu…

Lobu da un kareda pa kaza di Xibinhu. E sai pa el ba mata Xibinhu. Xibinhu sai ta kore, Lobu si tras, mas komu Xibinhu staba fartu el kansa, logu ki el kanba num skina e finka duedju na txon e fika odju ragaladu. Kantu Lobu txiga na skina, knsadu boka raganhadu pa djuda-l respira, el spia pa skerda, el spia pa sdreta e ka odja Xibinhu, tantu dezorentadu, el bira pa ragaladu ku otoridadi:

- Ragaladu, bu ka odja-m Xibinhu?

- Xibinhu? Xibinhu passa li gooossi li.

Nton, koitadu di Lobu sai ta kori tras de Xibinhu. Inda onti N pasa la atxa Lobu ta kore pa tudu ladu.