Gufongo

Gufongo, pa dos ome!

Gufongo
ingrediente	tempo
500g de farinha de mindjo Agu : +- 250 cl Sal : 1 cudjer de xa; 2 kilo de carabon	10 minuto pa mansa farinha dreto e faze um roda; 10-15 pa cora na braza; 20-30 minuto

 Kumode ke bu ta faze gufongo?

Tem dos forma:

I.

1.       Bu ta po lume na carabon pa bai ta faze braza;

2.       Bu ta kenta agu kuaze ta ferbe bu ta bota-l sal pa disfaze;

3.       Bu po farinha nun kena o nun tijela grande

4.       Ba ta po agu poco poco ta ba ta mistura ku farinha te fica um masa sima masa de pon.

5.       Ku dos mon bu ta mansa bu ta faze um bola,

6.       Dispos bu ta po kel bola riba-l menza bu ta pratxi-l, abri-l el ta fica partalaxa, ku +/-  dos a tres sentimetro de artura e diametro de des a 15 sentimetro.

7.       Dispos bu ta panha kel roda ku geto ku dos mon bu ta lima-l na lado pa el pode fica lizo.

8.       Ora ke el fica lizo, sem nenhum ratxadura, bu ta po-l riba-l braza pa el ba ta cora de um lado 10 minuto; dispos bu ta rabida-l pa cora na kel oto lado.

9.       Ora ke gufongo dja cora de dos lado, ago bu ta ntera-l na boradjo pa el cuzinha durante +/- 25 minuto.

II.

Kel sugundo forma de faze gufongo ta muda na ponto sete.

Em ves de bu po gufongo na braza, bu ta po-l dento de caleron ku agu ta ferbe pa kel masa cuzinha vinte minuto. Dispos bu tra-l bu ta po-l na braza pa el cora de dos lado, sima N fra na ponto 8.

Se bu faze gufongo des sugundo manera, anton ntera-l na boradjo é ka pa cuzinha, mas sin pa pode fika mas seco, crocante!

Gufongo ora ke el sta pronto é pa cume ku café, ku lete o ku karkel xá de padja. Xá de bergata (xali) o xá de sidrera, pa kenha ke gosta…

Tradisan ta fra: Gufongo ta cumedo na ora de café de parmanhan ou na café de tarde. Mas gufongo bu pode cume-l karkel ora, basta bu tene ngana...