Djabum! N sta nafo...

Djabumé [dja bu mé] ki tudo kuarta klase ta skrebe kriolo,

Tudo kenha ki nase na Kabo Verde ta papia Kriolo. Kralo, ta diskontado kes surdo-mudo. Sabedo ma tudo kenha ke tem kuarta klase ta skrebe se kriolo, xuaaah! E ta lere tudo kriolo, bazado…

Gosim, nes data tudo kenha ke alfabetizado ta skrebe se kriolo, pamode el sabe ma el tem leredor i ma el ta leredo sem prabulema.

Kabuverdiano, abo é naturalmente bilinge, ka bu inporta ku ortografia, nem ku gramatika ki e ka kel di bo. Bu tem ki ta papia kriolo. Si bu da na skrebe-l ka bu tuntunhi nem ka bu taranta, skrebe bu Lingua, dixa pa gramatiku ba distranka norma de Lingua ku se Alfabeto e mas tafanfan di libro. Rapara, Leredor bu sta lerem, mi tambe N ta lere kes testo li, e tudo es sta skrebedo na kriolo:

I.                 dja nhu fronta. La nho ca ta pô pé pamodi nhu ca convidado. e nem nhô ca é bem vindo. Um dia nho al di tchora na dispidida di kenha ku nhô atcha ma merece. Tudo alguem é livre pa tchora pa kem kel cre. Ou pa ca tchora pa ninguem. Um monti go ca ta tchorado pa el. Ou nhô ca sabeba di kela?

II.              Pa purtuges bera ki bu skrebe, bu ka ta ntende dretu nen purtuges. ----§---- Si bu ka ta ntende nos lingua skrebedu ku alfabetu ofisial, studa-l. Es ki e bu dever sugundu nº 3 di Artigu 9º di Konstituison. Violandu Konstituison, bu ta fika sen lejitimidadi di eziji pa Kabuverdianus dexa di goza ses direitu konstitusional di uza ses lingua na ses txon i na ses jornal. Bu ta ntende purtuges pabia bu studa-l. ----§---- Si bu ka ta ntende, ka bu le! O bu kre ben proibi-m uza nha lingua trokadu bu analfabetismu?! Idiotisi!

III.            Ami, djam ca tene palavra pa tanto desgostos e tristezas...palavra sta faltam djam in ca sabe de quenha é culpa...

IV.            Quond bô krê bô é MPD. Agora bê é .[   ]. Porquê bô ka dze iss na bo artig. .[   ]ka tem es subterfugio que bo pô na bô artig. Quond bô krê bô é MPD. Agora bê é .[   ]. Porquê bô ka dze iss na bo artig.[   ] ka tem es subterfugio que bo pô na bô artig.

V.              Ne arranque de campanha, ne entrega de processo, ne numero de assinaturas de apoio, ne boletim de voto, agora so falta ne urna. Sempre no ultimo lugar. Ka meste mut disputa que quel lá ninguem te trób el. Primer e pe .[   ].

Ku kes testo li di riba, N sta txuma-bu atensão ma Lingua e ka alfabeto… Skrebe kriolo, sempe!

Nota: Djabun na Dicionário de Doutor Manuel Veiga significa “bastá!”. Na kriolo de Fogo é pa signifika “bem feto! ma ku signifikado spresivo kontrario: Djabum = Bem feto, bu ta k*g*!”... Purtanto, djabum, bu ka tem nada faze ku mi (o ku el) asim bu ta prende… dja txiga, N sta nafo de… mas li ningem inda ka tene otoridade ku el.