24.2.10

Da-m un teta!

...
- In la, abo teta (ka) sta pididu mas!
A prupozitu di kel post li: N fika ta purgunta sobri sinifikadu di "teta". N fika ta buska otu signifikadu di "teta" . N atxa un, pois e, da-m un teta e un forma karinhozu di pidi mininus pikinoti, entri dos a tres anu, pa kunprimenta - fra mantenha!
Na Fogu, N ta lenbra Nha tenpu, kes gentis grandi ki ta poba borra di kanhotu na boka, entri denti ku djindjiba, antis di es pidiba nos un teta es ta leba parma o kosta di mon pa boka es ta linpa kes bokera i es ta trinka butxitxa: Es ta fra:- "da bu [tia ]un teta!" As ves du ta korre, sobritudu si ka tinha ningen grandi djuntu ku nos. Dja du sabeba ma e kel mon ki es linpa borra ki es ta linpaba nos el na kosta kaminza...
Nton, pa du ka fraba es mantenha, ora ki du odjaba es du ta ngatxaba.

Teta signifika trinka rostu i inkosta nos butxitxa, mas o menus duradu, na butxitxa di kenha ki sta pidi-nu "teta" ... - Ah sabidu!!! Deus ta fazebu omi (o ta dabu mudje!).
Oji nu ta obi, kuazi senpri. Ben kunprimenta, " ben da [ __ ] un beju!". En vez di Ben fra mantenha.
E klaru ki na post ki N faze referensia, teta ten otu leitura... Mas teta e senpri teta! El e karinhu, e amor i e pulsar di sentimentu maternal i... teta pode ser Mama o ubri, mas es dos ultimu nunka ka pode ser teta.

Teta na purtuges signifika "(...) depresiativamente glâmeas de alguns mamíferos ~ ÚBERE ... MONTÍCULO . Situação proveitosa usufruída por alguém. ~ MAMA"
Deskrioulizasãu kultural (?)"da-m un beju! da un beiju!
Tradução para Português : * da-me uma teta?

1 comentário:

  1. Omi, pensa seriamenti na kel disionariu. Bu sta na kaminhu sertu. Bu sa ta po-m diskubri rikeza di varianti di Djarfogu.

    Tudu varianti ta konta!

    Marsianu nha Ida padri Nikulau Ferera

    ResponderEliminar