*Rapas, dja N ka odja-bu velho na mundo!

- Lingua é ka de bosa!

Se bu ta papia kriolo, e se na kriolo bu ta fra [‘bakɐ], pur inzemplo, sugundo regra de AK (ex-alupeK), bu debe skrebe <baka>. Klaro, se bu ta fra ['vaka] entãu skrebe <vaka>.

[‘bakɐ]= ['vaka] dos prununsia sem mudansa di signifikado => b/v, nes kazo, ta konsiderado “interfone”, ou seja, variante (… dialetal).

Na Kriolo de Kabo Verde nu tem um monte de palavra ke tem dos forma de prununsia... Alem de [‘bakɐ]= ['vaka] du tem:

[pa’labrɐ]= [pa’lavrɐ]  

[bur’gɔȠɐ]= [bri’gɔȠɐ]= [vɨr’gɔȠɐ]

['berdɨ]= ['verdɨ]

[‘ɔbu] = [‘ovu]

[‘nojbu]=[‘nojvu], etc.

Nes data du ta da konta ma “b” sa ta bira “v”, na maioria de palavra na Lingua Kriolu. Ker dizer, ma kes palavra ki ta prununsiada ku “b”, mesmo kes la, sta ta ser prununsiado kada bes mas ku “v" de ki ku "b". Kel “v” etimolojiko ke ta pasaba  pa “b” na Kriolo, kes de maior uzo, oje, te na kes palavra “baziletal”, sta ta prununsiado  ku“v” em vez de “b”.

Bu tem poka brigonha => bu tem pouka vergonha (gosi maior uso!) Ka tem tadjo? Nau, ka tem. Kel li é rezultado  de kontato permanente, e kada bes mas frekuente, de Kriolo ku Lingua Portuges na Kabu Verde.

Li sim, sta um klaro inzemplo de diskriolizasãu e konsekuentemente“morte de nos Lingua na vertente baziletal”...

Nu odja kes fraze li:

1.     Rapas, dja N ka odja-bu bedju na mundo! => *Rapas, dja N ka odja-bu vedju na na mundo! => *Rapas, dja N ka odja-bu velho na mundo!

2.     Bu ka odja-m nha velho (pai)? =>* Bu ka odja-m nha bedjo?

3.     Dja N kume-l bedjo! => * Dja N kume-l velho!

4.     El ta xuta (bola) bedju… => *el ta xuta (bola) velho…

Se um falante de kriolo dexa de uza palavra “bedjo” (ke nalguns kazo ta signifika “rijo”, “forte”,  ku forsa, antigo, dja tem monte ano…) e el pasa ta uza apenas “velho”, kes fraze 1. ,  3 e 4. el ta dexa de fla-s? Ma, se el ka kre uza palavra “velho” pamode el é de LP, fraze 2. ka ta faze tudo sintido: * Bu ka odja-m nha bedju?
Ta faze algum sintido: - Bu ka odja-m nha bedja?

<velho> ka ta mata <bedjo>

Pensa! Na purtuges <pleno> e ka mesmo ke <cheio>…

Mante, mante fixe!