Um Intrevista

Na Kabo Verde nu tem um Lingua Nasional, el é Kriolo. Kriolo é lingua ki djarason di kabuverdiano kria pa du ta papia na txom de Kabo Verde, dja el tem mas de sinko seklo. É tambe Lingua ki alguns studiozo i skritoris tem stado ta skrebe desde século XIX, etimolojikamente.

Um intrevista

AL: Ki vantaji ki nu ta tem na enxina kriansa papia se língua materna?

RE: Prumero, ningen ka ta nxinado papia se Lingua Materno (LM). Sugundo, ora ki minis de 6-7 ano bai skola es ka sta bai la pa prende papia ses LM. Minis, nes idade dja es sabe papia ses LM, enton es debeba Bai Skola pa Prende Skrebe ku Ler Lingua ki es ta Papia. Lingua ki es ta papia é Kriolo. Pur iso, nu ta difende ma minis de Kabo Verde debe Prende Skrebe prumero Lingua ki es ta Papia.

Ora, na Kabo Verde e ka sim. Minis ta bai skola prende skrebe ku ler um Lingua ki es ka ta papia. Purtanto, purgunta debeba ser feto: Ki vantaje nu ta tem na nxina “kriansa” skrebe se língua materno?

Nu ta fla ma vantaje é bazado, mas du ta da só tres izemplo: Kel prumero grande vantaje, é ki minino sta bai skola prende ler ku skrebe se realidade sosio-kultural ki el konxe i ki el ta vive nel.

Sugundo grande vantaje, na skola minino ta kumensa ta prende strutura-eduka se pensamento inisial ki el ganha e ki el ta ta  ganha na se Lingua-kultura. É es Lingua-Kultura ki el meste prende, pa el pode kumunika-l - na oralidade o na skrita - pa tersero de akordo ku kes regra sosialmente aseite.

Tersero grande vantaje, skrebe na Língua materno é um ato de sidadania birado pa prezervasão, pa valorizasão i pa rekriasão de tudo patrimonio kultural material e imaterial de se kumunidade i de Kabo Verde.

Ku kel li nu ka kre fla ma minino ka tem vantaji na prende papia ku skrebe oto língua strangero: Ofisial i kes oto ki tambe é impurtante i nesesario.