1. Po fijon riba ( fixon sta pa fijon pedra ki tanbe ta txumadu fijon gros, bangolon, fijon kongu, sapatinha, o faba);
2. Sinta na muidoru ta roda po i ba ta bota mindju na braku, mon mon te ki kaba di mui 2 a 3 kaneka di mindju;
3. Mindju muidu, ta tentedu, ta tradu farelu djuntu ku rolon te ki fifa so farinha nu fundu di bala di tente. dispos ta tentedu rolon pa tra farelu (es e pa da limaria).
Normalmenti, ora ki kabadu di mui mindju, tentedu, fijon dja sta kuzinhadu.
4. Fijon ta kuadu pa tra kel agu ki fijon kuzinhadu na el. Dispos kaleron ta torna podu riba ku fijon. Gosi e ora di poi sal q.b, i agu linpu ki ta fika te altura di fijon, renti! Dixa agu ferbe. Enkuantu agu ta ferbe ta preparada un kaneka di agu ku sal pa barufa rolon i ta moleadu ku mon, te fi fika mas o menus umidu. Agu dja ferbe ta podu rolon riba di fijon, i dispos ta txanadu, pa stiba so un pokinhu... tapa kaleron pa argun minutu, 10 a 20. Ka pa diskise pamodi si lumi e forti, ten ki nfriadu agu, pelu menus un bes pa ka kema.
5. Enkuatu ta speradu rolon kuzinha, ta praparadu farinha: tanbe ku agu i sal ta barufadu te fi fika umidu. Anti di poi farinha riba di rolon pa subi (kuzinha ku vapor) ta fazedu un braku na rolon te ki txiga na fijon ki e pa nfria agu. krese agu pa ka kema. Frainha dja sta riba rolon txanadinhu, tanpa kaleron i spera mas 20 minutu. Djagasida dja fika prontu.
6. Poi kaleron na txon o riba di txamine, ku un prizi ta tradu sen kebra kel farinha ki dja subi sima kuskus (ora ki e ben fetu) ta podu di ladu, dispos ta tradu rolon pa po na taga o na kena o te na bala di tente.
7. Na kaleron dja fika so fijon. Txiga ora di tenpra fijon: rafuga sabola kugurdura di porku qb, pa poi na fijon.
Djagasida dja sta prontu, ago e po na pratu ba ta txuma minis pa toma kada un se pratu ku se kudje i ba ta manduka te kaba... si ka farta pa ka pidi ratutida pamo ka ta da... kada kenha ten se konta!
Sem comentários:
Enviar um comentário