Lingua-maternu

Nha Lingua Maternu e un kriolu.

Mi dja N seta skrebe nha kriolu ku Alfabetu Kauverdianu (AK). Nha ortografia e pesual dadu ki inda ka ten nenhun Gramatika normativu i institusional(izadu) ki ta nxina grafia kuretu di palavras i spresãu na kriolu nen formas sintatiku preskritivu.

Tudu kel ki N ta skrebe i manera ki N ta skrebe-l ta obedese un determinadu prinsipi linguistiku, baziadu na nha lingua-maternu, difinidu komu lingua ki tudu ser umanu ta prende (papia/fala) na mininu te 5-6 anu. E es lingua ki N prende papia na el ki N sa ta skrebe gosin ku AK.

Na auzensia di un lingua-padrãu ( ki debe ser nomiadu di Lingua Kauverdianu) difinidu na disionariu di linguistika komu: manera di papia/fala i di skrebe ki e konsideradu kuretu pa tudu Kauverdianu. Difinidu es lingua-padrãu, e el ki ta ben disiplina tudu varianti dialetal di kriolu pa djunta ses valor na (re)konstrusãu di un Lingua Nasional. E es Lingua Nasional, un konstrusãu di tudu nos, ki ta ben ser uzadu na komunikason susial... midia i ensinu ofisial.

Lingua-Padrãu e un 'spesi di sugundu lingua' ki tudu kauverdianu ta identifika ku el i so pur isu el debe seta-l (parse-m ma ofisialmenti kre formatadu es lingua-padrãu ku varianti-Santiagu i Sanvisenti. Un mal dja!) 

Komu Kauverdianu nu debe inkoraja konstrusãu i inplimentasãu di un Lingua-Padrãu ki e, pur prinsipi, disiplinadu i normalizadu na tudu duminiu di Gramatika... E el ki ta ben ser prifiridu na determinadus meiu susial, sobritudu ora ki objetivu di falanti/skreventi e faze tudu kauverdianu intende kusa ki sta fladu/skrebedu.