Vida e Manduku

Nha Lingua e ka bunitu me,

So pamo e ka dibo.

"N-labanta sedu

N-tapa ku Tuku
Sintadu nun banku
Ku mon na kexu
korpu mei mortu
Mortu di sonu
Tuku nha fidju
Pensa ma vida
E frenti barkon
Ku kopu na mon
Pa marra moku
 N-spia-l na odju
N-fra-l:
Tuku nha fidju,
Leba vida ku kudadu
Pa vida ka manduka-bu
Pamo vida e manduku...
Dja bu sta manduku d'omi
Bu kriadu sen konxe fomi
Ma bu meste tuma norti
Pa bu ka perde na mei di noti
Nes longu distinu ki sta-bu pa frenti
Dja pasa manduku tenpu
Abo sintadu na mesmu banku
Sen sai di kantu
Tenta palu menus um pasu
Un pasu sertu, mesmu ki lentu
Bu ten manduku kamin pa anda
Si bu kre txiga baranda
Labanta antis terra-l spanta
Pripara bu rola manta
Pa sta prontu o ki galu kanta
Bu ta ten manduku rakonpensa
I un selu grandi na bu testa
Si bu anda bu kamin di bespa
Ku pasu sertu, mesmu sen presa
Pa bu ka tonba na ladera
Tuku ha fidju
Ten kudadu
Pamo vida e manduuuuku..."