Adios Letra C ... de 21 de febrero...

Kusas ki nen na nha kurikulo ka sta. Nha veia di poeta:

"ADIOS LETRA C


Di pes djuntu
tudu jura
ma na Sidadi Velha
di boka raganhadu
senpri pa ladu direitu
diretamenti di Lisboa
bu dizenbarka

Pertu di bo
pasu a pasu
Kaka ku Seza, Xepa ku Txuka i otus mininu
diskunfiadu si
txiga
Ku spiritu di anju
es txiga
cha che chi cho chu
es staba ta kanta
xa xe xi xo xu
era rifron
Un truvon
di bu bokona spanta-s:
da César kel ki e di César!
i di sel e kumanda:
kuandu cha ta skrebedu xa
sima chato ta toma xarope
xe ta labradu che
sima xeque sen cheque
chi ta rabiskadu xi
sima chiça ti ki kai xícara
xo ta santadu cho
sima xogum ki bira chofer
chu ta letradu xu
sima chulé di xucro
Un palmatoria
bu abokanha-s
trokadu centro pa sentro
di etimon centru ben kel la
kel li ka ben di Roma ki fari di latin
Un borduada
bu morde-s
pabia sinto pa cinto
primeru e pa kurason
ultimu pa kalsa
Ti kai – duedjus na kaskadju
bu sopra-s
pa es podi ten tenpu dikora
ma conselho i concelho
ultimu ten Autoridadi
i kel otu e so pa laraxadus
Oredjas buru
na di ses
ku denti bu prega
tudu pamodi maça pa massa
kel li e pa Italianus
kel la pa burus
Oredja buru go nau!
es grita fepu
ku fantasma etimolujia
(moradu la pa ladu Roma nhu Sezar
nen retratu ka manda)
nos mimoria e ka kontratadu

Mutu menus mimorias
di kes ku nasimentu markadu na Nosu Sinhor Futuru
i di kes fora di luzofunia diaspurizadu
- nen tradison di uza alfabetu Don Dinis Pueta ka ten

Nos mimoria
e pa kimika ku orason
primeru ta da-nu grogu
sigundu, lugar na seu


Dentu kel un spertinhu
(António de Paula Brito
nhu padri santa-l)


djata
minis:
nu mara-l bokona
ku Serpenti di Afrika S
nu ntrega-l

Kapiton di Europa K
rumu Lisboa
na ragas di si primu Q
afinal,
kabesa di Afrika ku Europa nu erda
I ku djatu Xepa ku Txuka rispondi:
bu skesi si maridu CH i fidju TCH
kabesa dentu mar nu manda-s
pa es ka sukuta
ma nes kutelu so ta kantadu
xa xe xi xo xu, sima xutu na ku
di xatu ku si xaropi
di xeki sen xeki
di xisa kel xikra
di xogun ki bira xofer
di xukru ku xule
i txa txe txi txo txu, di txupa limon
na txeia txabeta nos kretxeu
na txoru matxikadu ses skrita kalapitxadu

90 i tal anu dipos
Kulokiu di Mindelu riforsa:
talves so pa skrebi si barbitxi
sinon, nen rabu Ç ka ta fika
15 anu dipos
Grupu di Padronizason prupoi:
C e pa bai!
ku primu, maridu i fidju
ku rabu tanbe
i fantasma etimolujia ta kunpanha-s


Karlus Magnu fla Amen
dipos di 4 anu ta matuta
i Benson Son Juze ki da
oranu pasadu, dipos di 7 anu ta sumara


Adeus letra C
N ta sana-bu oji
22 sol dipos di dia di mintira
i di Verdadi 2007 anu dipos
na Sentenariu nhu Baltas i Jerason Finka Pe na Tera
bespa Sakramentu bu partida
sakedu na txon di portu Sidadi Velha


Bersu Di Nos Tudu .
Marsianu nha Ida padri Nikulau Ferera
Kes ki ta dispreza kuzas ki e di-nos, ki nos ki inventa, ki kre po-nu pabaxu Tugas;
ki kre lapi-nu na alfabetu ki Tugas inventa (= kes alienadu),;
es ba TXUPA LIMON!

LI, NOS KI TA MANDA!!!
I DJA FIKA FLADU!!! "