Palavra di Omi é kel ki ka ten AGA

"PALAVRA É MÁS DI KI PALAVRA

Palavra
//
Di mininu é speransa
di mufinu ta kansa
//
(di nos inu nu ka alkansa
nen ku odju bibu na rabidansa)
//
di mi ku bo é aliansa
di omi onradu é si fiansa
//
di nhu séza é distinu
na frakeza é dizatinu
//
di tirsidjadu é praga
di fobadu é pa paga
//
di kristu é kandia
di maldozu é venenu
//
di tudu dia é sabedoria
ta nanse na alma serenu
//
di skritor é pa lê
di pastor é si fé
//
di dios ten si prigu
mas di fastios é kastigu
//
kel di agor é véu sukuru
pa kanta amor so kes más puru
//
di nhu eugéniu é prumesa
firmadu na séu linpu di futuru
//
dentu’l teral musesa
fase-l bibu son di resa
//
sikre fladu é bakandesa
é sentensa di bu kabesa
//
di kaladu é oru
di dizanimadu é txoru
//
kuali-kuali é kamuga
di ka bale ta ruga
//
di tuga pa nós é língua
mas kel di nos nu ka kre inda
//
e ben di tenpu butupériu
aregadu di tinta di mistériu
//
di amor é dadu
di fla dor é pizadu
//
na mei’ di breu é kaminhu
kel di kretxeu é sima un ninhu
//
di juizadu é benson
di patiadu é kaxon
//
di krenti é serteza
di bodona é konkista
//
di justu é pureza
di bandidu é pa dispista
//
ta sulusa é tristeza
di suzudu rejista
//
sen midida é bureza
na korida é un pista
//
na tereru é konpasu
di gereru é asu
//
arvi berdi na sekeru
na nevueru é kanderu
//
flor stikadu
na mô di pueta
//
tanbé é txabeta
ben tenpradu
//
e ta mata e ta kria
sima sol di tudu dia
//
kel ki nu nxinadu é tizoru
sima midju guardadu na tonboru
//
na kutelu ermu é gazadju
na tenpestadi rixu é sakor
//
di raiba é son di madju
ta baza fumu sima bapor
//
na nos língua e ka ten tadju
sikre ku friu o ku kalor
//
na fodja branku é paxon
na boka povu finason
//
ensaiadu sima un orason
pa rasguarda un nason
//
di kanpunês é nxada
di fregês é nogósiu
//
di matxikadu é fakada
óra k’e xatia ku si sósiu
//
spritu pueta n’el ki ta usti
tudu skonxu n’el ki ta susti
//
di pulítiku é kantiga
ensaiadu des mil bes
//
di krítiku fladu era un bes
di tudu ser si dia ta txiga
//
avé palavra ka di ningen
pa fla nau y pa fla amen
//
ka sabedu si idadi
é fidju kenha dundi k’e ben
//
mas é sinal di umanidadi
dádiva livri pa tudu algen"

Lisboa, 2/01/10

JOSÉ LUIZ TAVARESjltavares.poeta@gmail.com

PS: N posta es furtu li pa du ratadja-l, senpri ki nu kre!