Salungim ku Lambuzom

Salungim (solungim) é um nubre cumprido ke ta parse na seu, sinal de desgrasa. Pa esconjura es sinal ta fazedo um monte de rabuliso: ta gritado, ta tocado lata ku tamboro té ke kel nubre desfaze.

 

Mudjer ta pari salungin se el tem sete parto segido de fidjo femia ó de fidjo matxo. Kel fidjo de sete ta flado ma el é salungim. No entanto, se kel setimo bem de sekso diferente ta flado ma el el corta Salungim. Nes cazo ta flado mudjer ka pari nem Salungim (sekuencia de fidjo femia) nem Lambuzom (sekuensia de fidjo matxo)... antan, é es ultimo fidjo é protejido, é el ke ta corta Salungim ku Lambuzon, .

 

Mudjer ta fica ku medo de pari ora ke dja el tem ses fidjo femia o ses fidjo matxo de rajada, pamode el sta na risco de pari Salungim ó Lambuzom, conforme. É ke Lambuzom ku Salungim  tem sina de rotxa ó de mar (mata cabesa) ó te de mata argem, prenunsio de desgrasa na familia.

 

Por isso, ora ke nase Salungim ó Lambuzom na um caza ta dado tiro de baxo cama de parida, ta sendedo bela, ta razado santo, ta fazedo um monte de carantonha... é tudo pa corta sina!

Bu pode fra: "kuzas de tempo canekinha". Oje du ka tem mudjer de coraje pa tem tres fidjo ke fari sete... salungim ku lambuzom ka meste bem na Disionario... nos Lingua ku nos cultura ta fica cada bes mas pobre? Ná, odja li:

 

- Bu tem sina de Lambuzom! Dja N fra-bu el.