Skrebe un Kriolu: FonoLOJIKU o EtimoLÓGICO?

Karu leitor: ami dja-m dura ta skrebe Lingua ki N ta papia ku bazi na regras di Alfabetu Kabuverdianu (AK) : FonoLOJIKU publikadu pur DL di___/ 2009. Ma N ta viola un di se bazi ki e asentuasãu grafiku. N ta skrebe nha Kriolu sen asentu grafiku, pamodi N ta difende ma el e disnesesariu.

I dja-m skrebe narguns post publikadu, ma mi tantu fas skrebe lingua ki N ta papia ku bazi na AK “fonoLOJIKU” o ku bazi “etimoLOGICO”.

Ami, au kontrariu di arguns "alupekistas" - ki na difeza/inpozisãu di skrita di un karkel Kriolu ta fra ma “fonoLOJIKU”, e midjor pamodi se skrita e “LOJIKU”, N ta difende ma skrita “etimoLÓGICO” e tanbe el “LOGICO”… so ki se LÓGICA di skrita sta na se “étimo”, ki e di Lingua Purtuges, sobritudu. Purtantu, karkel di kes forma di skrebe ki “skrebedor” di Kriolu skodje e LOJIKU/LOGICO, desdi ki sosializadu i padronizadu pa tudu algen skrebe un Lingua Nasional. Naturalmenti, Lingua di Kabuverdi sera nomiadu di Lingua K(c)abuverdiana.

Nu meste da tenpu un Tenpu, ma mi e di kes ki ta difende sosializasãu i inplementasãu di ensinu-aprendizaji di Lingua Kabuverdiana na tudu teritoriu nasional ku bazi nun planu Linguistiku Bilingi.

So ki sima sta ka pode fika!

Dispos des informasãu/sklaresimentu, karu Leredor, dia ki un Guvernu di Kabuverdi ofisializa, midjor sosializa, “skrita padrãu di LKv” na tudu Skola di Kabuverdi, “fonoLOJIKU” o “etimoloGIKO”, ami N sta prontu pa sigi es skrita normativa. Te la… N ta kontinua ta skrebe nha Kriolu di forma ki sta “dikretadu”, i o ki sta en vigor. Pamode N ten nesesidadi di rajista "es nos lingua-kultura oral pa ka perde mas di ki sin" . Ka bu totxa-m! (anglisismu(?) dont touch me!)

I mas, nu meste iduka i sosializa lingua-kultura ki nu ta papia na Skola: prezerva nos identidadi.
E na Skola ki ta nxinadu, ta prendedu i ta socializadu forma di tratamentu. Enfin, ta nxinadu-idukadu na Lingua-padrãu na se forma consideradu kuretu pa kumunidadi di fala/skrita. Enkuantu nu ka faze kel li nu ka ten lijitimidadi pa nu kobra nada.

Dibati ten di kontinua!