“BABEL” ORTOGRAFIKU

E PRISIZU IVITA “BABEL” ORTOGRAFIKU NA SKRITA OFISIAL/NASIONAL DI LINGUA KAUVERDIANA!


Na artigu anterior publikadu na Liberal Napolão skrebe :“ALUPEC não é unicamente estudo sobre o alfabeto cabo-verdiano, mas sim um conjunto de programas sobre a língua crioula, com métodos, formas e estratégias bem definidos a curto, médio e longo prazo.” Nes Parti el tem razãu, e di fatu un conjunto de programas sobre a língua Kauverdiana pa dignifika Nason Kauverdiana. Di akordu ku Fernando Pessoa (…) e é a língua com tudo quanto traz em si e consigo que define a Nação. Nos e un Nason, grasas a Deus Independenti.

Ago, mas uns paragrafus pa sklaresi/rekorda leredoris, letra "Cc" ka foi trokadu pa letra "Kk", mas sin, komu txigadu konkluson ma letra "Cc" ka e nesesariu pa skrebe ninhun kriolu di Kauverdi el ka ta faze parti di alupec - alfabetu kauverdianu. Suma letra “q”.

Alfabetu Kauverdianu e un Alfabetu Kauverdianu propostadu pa Studiozus Kauverdianus ki ta pirmiti skrebe tudu son di fala di kriolu. Purtantu, kre relasiona-l o konpara-l ku otus ki tanbe ten y en partikular ku Alfabetu Purtuges ki foi fetu pa Portugueses pa skrebe ses Lingua Portuguesa ta parse-m un eru. Eru pamodi sa ta konparadu di forma dizigual dos alfabetu pa skrebe dos Língua diferenti.

N ta intendi, sertamenti, kenha ki sa ta difendi “Cc” y “Qq” e kenha ki dja sta alfabetizadu na purtuges. Y ki tene un abitu/mekanika di skrebe purtuges y di skrebe kriolu ki el ta papia ku Alfabetu Purtuges ki el prende na skola o nau, di se alta kriasãu.

Pa karkel analfabetu (di karkel pais di mundu) ka ten letras ten apenas palavra ku se son, y se signifikadu. Ora ki inplementadu ensinu na Lingua Kauverdiana nos minis di Kauverdi ta bai pa skola pa bai prende le ku skrebe língua ki es ta papia na ses kumunidadi. Logu, ka ta ten konfuson na skrita di Kauverdianu ku ninhun otu língua pelu sinplis fatu di es ka sabe skrebe otu língua. E ses ta ser ses primeru kontatu ku skrita.

Ki fika klaru, N ta difende ma Língua Portuguesa debe kontinua ta nxinadu desdi skola primaria.

Finalmenti, "Cc", "Qq" y otus miodezas so ta faze falta na Alfabeto Portugês, purtantu e la ku es.