AKORDU ORTOGRAFIKU

Na Kauverdi, di Santanton te Djabraba pasa pa Strangeru e txigadu ora di seta uniformizason di nos skrita y, pur isu nu debe uza ALUPEK. Uza-l pa nu pode odja undi ki nu meste txiga akordu na manera di skrebe Kauverdianu a partir di kes dos grandi variedadi di kriolu. Ka nu perde mas tenpu ku diskursu ki ka ta bai na sintidu di valorizason di un akordu nesesariu pa skrebe Lingua Kauverdianu.
Nos nu ka sa ta fala di un akordu na Lingua entendidu komu "un sistema di sons y signifikadus ki sta rumadu nun determinadu manera pa permite interason umanu". - Nes aspetu nu ka meste pre akordu ninhun, falantis ta bai txiga un akordu tasitu a medida ki konbersa ta ta bai! - Mas sin nun pre akordu nesesariu pa di fiksason di son, istu e, di skribe kusas ki nu ta pensa y nu ta fra pa kualker pesoa eskolarizadu le o obi e intendi se signifikadu.


Tudu Lingua di mundu ki oji ten un skrita ofisial tevi un perkursu di (des)akordu pa ki oji es ten ses skrita uniformizadu. Basta nu le na sitius adekuadus pa nu konfirma ma Lingua ki ta skrebedu na mundu, tudu es, en varius mumentus de se storia es tevi ki ser ratifikadu na forma di skrebe pa kontinua ta konpanha mas o menus se forma falado. Naturalmenti, si oji es ALUPEK e bon pa da inisiu a skrita di Kauverdianu e pa ta ta implimenta, ma manha se ben ta mostra difetu nu ta ratifika-l y pontu final.
Ago, ki nu meste informa pa nu pode ten un vizon alargadu y mas o menus sientifiku di lingua, sen paixon y arugansia ... e urgenti.

Si nu kumesa ta informa sobri signifikadu di akordu ortografiku ki entra en vigor es anu e ki Kauverdi e parti y kanba na storia di kes varius akordu, talves nu ta pasa ta pensa diferenti, ku mas kabesa e 'O Despertar' já 'adotou' novo Acordo Ortográfico: Dja go, argun instituison di Kauverdi dja kumesa ta implimenta es akordu?

Ma tanbe akordu ortografiku na Kauverdi e ka impusivel. Nota, se pusivel un akordu pa skrita di Lingua Partuges - lingua papiadu na kuatu kontinenti y pa oitu stadus indipendenti y suberanu, enton pa nos kauverdianu - un so povu y un so nason- e mas faxi konsigi un "akordu unifikadu" pa skrebi nos Lingua Nasional.

Pa N termina, Anu 2009 debia ser un anu di inplimentason y di ensinu di skrita na Lingua Nasional ofisial. Pamodi si atxa un forma di alfabetu unifikadu pa skrita di un Lingua Nacional e trabadju di spesialistas, implementason e un DISIZON PULITIKU.