Um texto de Rito DeCarvalho (kopi-paiste!)
KARTA ABERTA PA NHA KUMUNIDADE (PARTE II)
Karo amigos, familias y nha kumunidade Kaboverdiana,
É ku sentimentos musturado ki n'sta skrevi nhos hoje nes epoka di festa. N'sta xinti alegria...pamodi é tempo di festa, mas ao mesmo tempo oras kin djobi pa traz n'ta odja nha kumunidade ta luta sem consigue txeu progresso.
Pa tudo mai ku pai: Xinta ku bu fidjos y enxinas valores y mural di vida. Ser um lider pa es pes podi atxa sucesso dentu di casa em bes des bai djobel na rua.
Pa tudo jovens: Sabi ma nhos tem escolhas na vida. Fika longi di drogras, di rua y bandidos. Usa bu tempo di manera útil: fika na scola, fazi um formason pa bu ser um bom homem y mudjer y djuda bu kumunidade.
Pa tudo deportados: Nu ka skeci di nhos. Nu sta y sempre nu ta sta li pa nhos. N'ka podi fla ma n'ta comprendi pamodi n'ka sta na nhos pozison. N'ka podi fla ma nhos ta fika dreto pamodi nunka n'stive la. Mas kuza kin podi fla nhos é ma diportason é fim di um jornada y comeso di otu. Ser forti, ku fé y coragem nhos vida ta midjora.
Pa nha kumunidade: Nu encara es momento di festa li komo um momento di reflexon. Nu djobi pa traz y odja undi ki nu fadja. Fin di 2010 sta txiga, y poku foi feito pa muda nos kumunidade. Nu ka podi fla ma “dja nu realiza nos sonhos” enquanto nos irmon ku nos irma na Brockton, Providence y Dorchester sta ser morto, deportado y prezo pamodi droga. Nu mesti midjora por amor a nos criancas. Nu mesti muda por amor a nos herois ki da ses vida pa nu podi ser indipendenti y scodji nos distino.
Nu ka mesti sta ta guerra pamodi PAICV, MPD o UCID. Nos é mas grande ki kela. Cabo Verde é mas grandi ki kela. Nu ka mesti tem mesmo opinion politica ou interesse desportivo pa nu uni pa Cabo Verde y kela ke beleza di democracia y liberdade.
Em nomi di nha kumunidade n'kre deseja nhos Boas Festas. KA BU BEBI Y CONDUZI.
Por favor manda bus ideia, opinion y sugeston pa rito83@gmail.com o poi bu comentario pa nu podi comeca kria um plano pa nos kumunidade.
Ku txeu karinho,
Rito DeCarvalho
Pawtucket, RI
rito83@gmail.com
Sem comentários:
Enviar um comentário