A Nação: Grandi Nobidadi!

Ten "Merkana ki ta papia nos lingua dretu." , ten Xines ki ta papia kriolu dretu, ten olemãu ki ta papia kriolu dretu, ten Finisiu ki ta papia kriolu dretu, enfin tudu strangeru ki kre papia kriolu ten di papia-l dretu.

Mas kuze ki signifika papia kriolu, o otu Lingua karkel, dretu?

E pusivel fra ma kauverdianus ka ta papia kriolu dretu?

Nu sabe ma prabulema sta mas e na skrebe lingua kauverdianu sigundu un norma. Prabulema sta na Kauverdianus tudu seta skrebe sugundu un norma Alupekiana o etimolojiku.

Nobidadi di es intrivista e li ki sta, Merkana sa ta skrebe Lingua Kauverdianu ku bazi na regras di Alfabetu Kauverdianu:

"(...) Desdi kuandu nha sa ta uza alfabetu kabuverdianu (ex-ALUPEC)?

Desdi 2002.

Foi difisil prende-l?

Ka foi difisil nau. Klaru, pa prende kualker lingua ka e fasil. Mas, foi mas fasil ku uzu di ALUPEC. Repara, N tevi so 6 semana di aula. Es tenpu e poku pa studa tudu palavra. Kantu N txiga Kabu Verdi, N fika ta obi palavras ki N ka obiba antis. I ku ALUPEC foi fasil pa N desidi modi N ta skrebe dretu kes palavra pabia ALUPEC e fonolojiku – istu e, ten so un manera di skrebe kada son. Bu ka ten ki purgunta: “Mas, na palavra ‘fasil’ modi ta skrebedu son [s] – e ku S, ku C, ku Ç, ku SS, ku X o modi?” Dja bu sabe ma tudu son [s] ta skrebedu ku S i txau! N ta atxa ma grandi virtudi di ALUPEC e kel la.

Dja nha uza (na le i/o skrebe) ALUPEC txeu o poku?

Dja N uza-l txeu na le i na skrebe. Dja ten txeu material skrebedu na ALUPEC. I gosi alguns internauta ta uza regras di ALUPEC, integral o parsialmenti.

Purtantu, nha konxe ALUPEC ben. Nha konxe otus lingua, fora ingles ku kabuverdianu?

Dja N konxe txeu lingua. Desdi mininu, N gostaba di studa linguas. Fora ingles ku kabuverdianu, N studa inda franses, tibetanu, swahili, purtuges i hindi-urdu.

Nton, nu ben konpara ingles, franses, purtuges i kabuverdianu. Nha imajina ma nha ten, pa kada un di es 4 lingua, un konjuntu di palavras ki nha sa ta obi pa primeru bes. Kal konjuntu di palavras ki nha al konsigi skrebe ku menus probabilidadi di da erus ortografiku i pamodi?

Kabuverdianu! Kel li, N ka ten duvida! I pabia ALUPEC e lojiku. (...)" Ler intrivista tudu li sin